ඡායාරූප කලාව විවිධ ශානරයන්ගෙන් සැදුම් ලත් කලා මාධ්‍යයකි. විවිධ ඡායාරූපකරණයන් මෙම කලාව තුළ අන්තර්ගතව ඇත. උදාහරණ ලෙස ස්වභාවධර්ම ඡායාරූපකරණය, භූ දර්ශන ඡායාරූපකරණය, ආලේඛය ඡායාරූපකරණය වැනි විවිධ ඡායාරූපකරණයන් අපට මෙම කලාව අධ්‍යයනයේදී හමු වනු ඇත. එසේ අධ්‍යයනයේදී හමු වන තවත් එක් සුවිශේෂී ඡායාරූප කලාවක් ලෙස මැක්‍රෝ ඡායාරූපකරණය පෙන්වා දිය හැක. මැක්‍රෝ ඡායාරූපය යනු අපගේ පියවි ඇසට සමීපව නොපෙනෙන යම් ජීවී හෝ අජීවී වස්තුවක් 1:1 විශාලනයෙන් යුතුව ඡායාරූපයට නැගීම වේ. මෙම ඡායාරූපකරණය වනජීවී ඡායාරූපකරණය හා Photomicrographs ඡායාරූපකරණය හා බැඳී පවතින්නකි. වනජීවී ඡායාරූපකරණය ඈත ඉතිහාසයකට උරුම කම් කියන ඡායාරූපකරණයකි. සතුන් සහ මිනිසුන් අතර ඇති සම්බන්ධතාවයේ ප්‍රතිඵලයක් ලෙස මෙම කලාව බිහිව ඇති අතර මුලින්ම මැක්‍රෝ ඡායාරූපය බිහිවන්නේ වනජීවී ඡායාරූපකරණය ආශ‍්‍රිතවය. ඉතා කුඩා සතුන් ඡායාරූපයට නැගීම සහ ඔවුන් පිළිබඳ තොරතුරු සෙවීම මෙහි මූලාරම්භය විය. එම අවදිය ඡායාරූපකරණය සම්බන්ධයෙන් පර්යේෂණ රැසක් සිදුවෙමින් පැවතුන කාලයක් විය. එකී පර්යේෂණයන්ගේ ප්‍රතිඵලයක් ලෙස Photomicrographs ඡායාරූපකරණය බිහි විය. මැක්‍රෝ ඡායාරූපකරණය සම්බන්ධයෙන් සාකච්ඡා කිරීමේදි ඒ හා බැඳී පවතින Photomicrographs ඡායාරූපකරණය අත් නොහළ හැකි අංගයකි. Photomicrographs ඡායාරූපකරණය අතීතයේදී මිනිස් අක්ෂි පරීක්ෂාවලට, ඉතා කුඩා අක්ෂර ලේඛනයට සහ විද්‍යාත්මක පරීක්ෂණ සඳහා යොදා ගෙන ඇත.